SAÚDA: Eva María Pérez Gamote

Queridos veciños e veciñas:

Nun concello tan amplo e cunha poboación tan dispersa como o noso, a comunicación entre a veciñanza e o Concello non sempre resulta sinxela. A pesar do traballo constante por estar preto das inquedanzas da cidadanía e dar resposta ás súas necesidades, ás veces non é doado chegar a todos os fogares.

Para mellorar ese diálogo, o Concello de Vilardevós pon en marcha novas canles de comunicación máis directas e accesibles, pensadas para achegar a información municipal á veciñanza e facilitar tamén a comunicación no sentido inverso.

Un dos principais instrumentos é a app gratuíta “Vilardevós Informa”, dispoñible para descarga, a través da cal poderedes recibir información directa do Concello: bandos, avisos, novidades e toda aquela información que consideramos de interese xeral. Unha ferramenta pensada para avanzar cara a un concello máis transparente, aberto e accesible.

Queremos que esteades ao día do que fai o concello por vós: dos servizos que presta, das obras en marcha ou en fase de xestión e, en definitiva, das iniciativas que inciden directamente na mellora da vosa calidade de vida.

Desde esta páxina oficial do Concello de Vilardevós, e en nome de toda a corporación municipal, queremos tamén ilusionar á nosa xente con proxectos de futuro que acheguen beneficios reais ao noso concello, especialmente en ámbitos como o turismo rural, a promoción do emprego e a posta en valor da artesanía e dos produtos da terra.

Seguiremos traballando con responsabilidade e compromiso pola veciñanza de todos os pobos de Vilardevós, sen distinción, como vimos facendo ata o de agora.

Eva María Pérez Gamote - Alcaldesa de Vilardevós